《Stickypedia系列－安全性行為：第五寶》
今次我地終於講到最後一寶－紙巾～！！！紙巾經常係性行為過程中俾人忽略，但佢真係好緊要架！除咗可以防止分泌物周圍飛，仲係清潔自己（同附近）嘅好幫手～🚽
唔知大家有無聽過有人除套果陣，一個唔小心，就將分泌物飛到周圍都係💦⋯⋯ 有時唔單只飛到地下污糟曬，仲噴到去對方身上，擔心會有懷孕或者感染性病嘅風險😖
緊記「除套嘅時候可以用紙巾包住前端，連紙巾一齊將安全套除落嚟」，咁就唔怕內裡嘅分泌物飛到周圍都係～ 此外，除套嘅時候背向伴侶，就更加避免到分泌物係過程中流到對方身上！
而清潔自己方面，發生完性行為之後可以用紙巾清潔下體／手／口／玩具.....抹走分泌，除咗可以令身體乾爽啲，仲可以避免細菌或者病毒接觸到其他身體部位，例如係尿道。特別係女性，因為陰道同尿道好接近，所以都建議係性事後要去一次廁所，會有助排走啲菌🚽
下次發生性行為之前，記得放定張（盒）紙巾係身邊啦～
我地Stickypedia第一個系列《安全性行為》話咁快就到咗尾聲。係呢個系列中，我地一一為大家介紹咗「安全性行為」嘅五寶：安全套、潤滑劑、口交膜／指套、Consent 共識、紙巾。下次發生性行為之前，記得準備好呢五寶，咁就萬無一失啦！
小編已經籌備緊下一個Stickypedia系列文章～ 如果大家對任何方面嘅性知識有興趣，想了解多啲的話，都歡迎係下面留言，有機會成為之後新系列嘅主題架～
Comments